Asalin hoton,
KDSG
Bayanan hoto,
Jam’iyyar APC ce ƙarƙashin Gwamna Uba Sani ke mulkin jihar ta Kaduna
Jam’iyyar APC mai mulki a Najeriya ta lashe duka zaɓukan cike gurbi uku da aka gudanar a jihar Kaduna, kamar yadda hukumar zaɓe ta Inec ta sanar.
Sakamakon zaɓen majalisar tarayya ta Chikun/Kajuru ya nuna cewa Felix Bagudu na APC ɗin ya samu ƙuri’a 34,580 kuma ya doke na PDP da ya zo na biyu da ƙuri’a 11,491.
Hakanan, APC ta yi nasarar cin zaɓen ‘yan majalisar jiha na mazaɓun Zaria/Kewaye da Basawa.
A zaɓen Zaria/Kewaye, Balarabe Abdullahi ya sanar cewa ɗantakarar APC Haruna Ihamo ne ya cinye da ƙuri’a 26,613, yayin da abokin hamayya na SDP Nuhu Sada ya samu 5,721.
A zaɓen Basawa kuma, Farfesa Nasiru Rabiu ya tabbatar da cewa APC ta samu ƙuri’a 10,926 kuma ta doke PDP mai 5,499.
Jam’iyyar APC ce ke mulkin jihar Kaduna, bayan ɗantakarar Gwamna Uba Sani ya lashe zaɓen gwamna na watan Maris 2023.