Asalin hoton, Getty Images
Jam’iyyar APC ta lashe zaɓen cike gurbin ɗan majalisar dokokin jihar Zamfara mai wakiltar Ƙaura Namoda ta Kudu a jiya Alhamis.
Jami’in hukumar zaɓe mai zaman kanta ta Najeriya, Farfesa Lawal Sa’ad, ya ayyana Kamilu Sa’idu na jam’iyyar APC a matsayin wanda ya lashe zaɓen tare da samun ƙuri’a mafi rinjaye.
Sakamakon ya nuna Kamilu ya samu ƙuri’a 8,182, yayin da abokin karawar sa, Muhammad B. Lawal Kurya na jam’iyyar PDP, ya samu ƙuri’u 5,544.
A makon da ya gabata, hukumar zaɓe mai zaman kanta ta Najeriya ta gudanar da zaɓukan cike gurbi a jihohi da dama, inda jam’iyyar APC ta lashe zaɓe a mazaɓu 12, APGA ta lashe kujeru biyu, PDP ta lashe kujera ɗaya, da kuma NNPP ta lashe ɗaya.
Sai dai, an bayyana zaɓen majalisar dokokin jihar Zamfara a mazaɓar Ƙauran Namoda ta kudu a matsayin wanda bai kammala ba saboda hargitsin da ya haifar da soke sakamako daga rumfunan zaɓe biyar.
Lamarin ya sanya an sake gudanar da zaɓen a jiya Alhamis, inda jam’iyyar APC ta lashe.
Zamfara na daga cikin jihohin Najeriya da jam’iyyar hamayya ta kayar da gwamna mai ci a zaɓen 2023, inda Dauda Lawal na jam’iyyar PDP ya kayar da tsohon gwamnan jihar Bello Matawalle na APC, wanda ya zafafa adawar siyasa tsakanin manyan jam’iyyun biyu.
Daga baya, shugaban Najeriya Bola Tinubu ya naɗa tsohon gwamnan jihar muƙamin minista a ma’aikatar tsaro ta ƙasar.