An binne gawar tsohon shugaban Najeriya Muhammadu Buhari a gidansa da ke Daura na jihar Katsina da misalin karfe 5:50 na yamma.
A ranar Lahadi, 13 ga watan Yuli ne Muhammadu Buhari ya rasu a birnin Landan na Birtaniya bayan shafe dogon lokaci yana jinya.
Muhammadu Buhari ya rasu yana da shekara 82 a duniya, shekara biyu bayan sauka daga muƙamin shugaban ƙasa.
Buhari ya mulki Najeriya a matsayin soja daga watan Disamban shekara ta 1983 zuwa watan Agustan 1985 kafin tuntsurar da gwamnatinsa.
A shekara ta 2015, Buhari ya samu nasara a zaɓen shugaban ƙasa bayan kayar da shugaba mai ci a wancan lokaci, Goodluck Jonathan.
An rantsar da shi a matsayin shugaban farar hula, inda ya yi mulki Najeriya wa’adi biyu (shekara 8) daga ranar 29 ga watan Mayun 2015 zuwa 29 ga watan Mayun 2023.
Buhari ya sha fama da jinya tun farko-farkon mulkinsa na farar hula, inda ya riƙa safa da marwa daga Najeriya zuwa Landan domin neman lafiya.
Wasu masharhanta sun bayyana cewa rashin lafiyarsa ta rage karsashinsa a harkar shugabanci.
A ɓangare ɗaya, masu suka sun zargi gwamnatinsa da ɓoye rashin lafiyar da ke damun sa.
Muhammadu Buhari ya rasu ya bar mata ɗaya – A’isha Buhari – da ƴaƴa 10.