Asalin hoton,
State House
Mai magana da yawun tsohon Shugaban Najeriya, Muhammad Buhari, Mallam Garba Shehu, ya bayyana yadda Buhari ya ƙi karɓar wasu kyautuka lokacin yana mulki, ciki har da kyautar jirgin sama.
A shirin Inside Sources na Channels TV, Garba Shehu ya bayyana cewa Buhari ya ƙi amince wa da karɓar kyautar agogon lu’ulu’u daga wani ɗankasuwa a Najeriya, da kuma kyautar jirgin sama daga ƙasar Haɗaɗɗiyar Daular Larabawa.
“Shugaban ƙasa ya kalli agogon, ya ce ‘Agogon lu’ulu’u? Ba zan iya saka wannan ba. Ku faɗa masa yana ƙoƙari…kuma za mu ci gaba da ƙarfafa masa gwiwa. Ya ci gaba da ɗaukaka sunan Najeriya, amma ku mayar masa da agogon nan. Ba zan iya amfani da shi ba,’ Garba ya bayyana ranar Juma’a.
Garba ya kuma bayar da labarin ziyarar da Buhari ya kai birnin Dubai a 2016, inda shugaban ƙasar ya yi tayin kyautar jirgin sama da zai yi amfani da shi har bayan sauka daga mulki, amma Buhari ya ƙi karɓa saboda ba gwamnatin Najeriya za a ba wa ba.
“Sarkin Abu Dhabi ya tambayi shugaban ƙasa [Buhari] wane nau’in jirgi ya fi so. Buhari ya ce idan gwamnati Najeriya za a ba wa, zan karɓa. Sai sarkin ya ce a’a naka ne na ƙashin kai, ta yadda ko da ka bar mulki za ka ci gaba da amfani da shi.”
“Buhari ya ce ba ni buƙatar jirgi idan na bar mulki, ba zan ma iya kula da shi ba,” Garba Shehu ya ƙara da cewa.
Buhari ya mulki Najeriya daga watan Mayun 2015 zuwa Mayun 2023, kuma ya rasu a ranar 13 ga watan Yuli.
Kuna iya karanta bayani kan rayuwarsa a labaran da ke ƙasa: