Asalin hoton, ActuNiger
Shugaban Chadi, Mahamat Idriss Déby Itno, ya kammala ziyarar kwanaki biyu a birnin Yamai na Nijar.
A ziyarar, ya yi taro da shugaban Nijar, Abdourahamane Tiani, inda suka cimma muhimman yarjeniyoyi.
Muhimman abubuwan da suka cimma sun hada da:
- Zirga-zirga tsakanin ƙasashen ba tare da shinge ba
- Samar da bututun man fetur daga Nijar zuwa Chadi
Haka nan, sun tattauna kan wasu batutuwa da ke nufin ƙara haɗin kai don inganta ci gaban al’umomin biyu:
Tallafa wa juna wajen yaki da ta’addanci
Shugabannin sun ƙara nanata goyon baya ga haɗin gwiwar tsaro, musamman wajen yaki da ta’addanci.
Sun amince da haɗin kan ɓangarorin tsaronsu wanda ya kawo nasarori a wannan yanki.
Ministocin tsaro na ƙasashen biyun sun yarda su gudanar da taro da ƙwararru don inganta tsaro.
Mayaƙan jihadi sun sha yin kwantan-ɓauna ga sojojin Nijar da Chadi, wanda ke jawo asara mai yawa.
Zuba jari
Har ila yau, sun amince da inganta harkokin kasuwanci tsakanin ƙasashen biyu tare da tabbatar da zaman lafiya, tsaro, da ci gaba.
Wannan ya haɗa da:
- Bunƙasa ɓangaren zuba jari
- Karfafa haɗin kai wajen yaƙi da kasuwanci na bogi
- Amfani da ƙarfafawa wajen mu’amalar kasuwanci
- Ƙara wa matasa kwarin gwiwa don koyon sana’o’i da bunƙasa masana’antu
Samar da bututun mai daga Nijar zuwa Chadi
A fannin makamashi, sun amince da haɗa kai don kammala aikin wutar Salkadamna wanda zai ba da megawat 5,200.
Nijar ta amince da bayar da man dizel ga Chadi.
Haka nan suna duba yiwuwar gina bututun mai daga Nijar zuwa Chadi.
Ɓangaren siyasa da diflomasiyya
A fannin diflomasiyya, sun yi maraba da aika tawagogi don tattauna batutuwa masu muhimmanci ga ƙasashen biyun.
Sauran abubuwan da suka amince sun haɗa da:
- Ƙarfafa dangantaka a fannonin siyasa, kimiyya, da al’adu
- Yin zaman tattaunawa akai-akai don warware matsalolin da suke damun ƙasashen
- Ziyartar juna ba tare da biza ba
- Nijar ta maraba da buɗe ofishin jakadanci na Chadi a Diffa
- An bai wa ministocin harkokin wajen umarni don aiwatar da matakan nan ba da daɗewa ba
Janar Abdourahamane Tiani, shugaban gwamnatin mulkin soji na Nijar, ya gode wa shugaban Chadi kan ziyara.
Ana sa ran wannan ziyara za ta inganta dangantakar ƙasashen biyu, masu fama da matsaloli, ciki har da rashin tsaro.